اردو ورلڈکینیڈا ( ویب نیوز ) امریکا نے مشرق وسطیٰ میں ایٹمی طاقت سے چلنے والی میزائل لے جانے والی آبدوز تعینات کر دی ہے۔

امریکی بحریہ کے ترجمان کا حوالہ دیتے ہوئے رپورٹ کیا کہ امریکی بحریہ نے ایک گائیڈڈ میزائل آبدوز تعینات کر دی ہے جو مشرق وسطیٰ میں 154 ٹوما ہاک میزائل لے جانے کی صلاحیت رکھتی ہے۔

خلیجی ملک بحرین میں مقیم امریکی 5ویں بحری بیڑے کے ترجمان کمانڈر ٹموتھی ہاکنس نے بتایا کہ ایٹمی طاقت سے چلنے والی آبدوز امریکی ریاست جارجیا سے روانہ ہوئی اور جمعہ کو نہر سویز سے گزری۔ تاہم کمانڈر نے مشرق وسطیٰ میں یو ایس ایس فلوریڈا کے مشن یا اس کی حالیہ تعیناتی کی وجہ پر تبصرہ کرنے سے انکار کردیا۔

واضح رہے کہ مشرق وسطیٰ میں امریکہ کا پانچواں بحری بیڑہ خلیج فارس میں تنگ لیکن اہم آبنائے ہرمز پر گشت کرتا ہے جہاں سے تیل کی تمام کھیپوں کا 20 فیصد گزرتا ہے۔اس خطے میں یمن سے آبنائے باب المندب اور نہر سویز تک پھیلا ہوا بحیرہ احمر شامل ہے، اس کے علاوہ مصری آبی گزرگاہ جو مشرق وسطیٰ کو بحیرہ روم سے ملاتی ہے۔