اردو ورلڈ کینیڈا ( ویب نیوز) کینیڈا اور امریکہ کے سینئر جسٹس اور پبلک سیفٹی حکام آج اوٹاوا میں ملاقات کریں گے۔ اس دوران سرحد پار بندوقوں کی اسمگلنگ اور منشیات کی اسمگلنگ کا معاملہ دونوں ممالک کے ایجنڈے پر ہوگا۔

کینیڈا-یو ایس کراس بارڈر کرائم فورم پبلک سیفٹی منسٹر مارکو مینڈیسینو، وزیر انصاف ڈیوڈ لیمٹی اور امریکہ میں ان کے ہم منصبوں، ہوم لینڈ سکیورٹی کے سیکرٹری الیجینڈرو میئرکاس اور اٹارنی جنرل میرک گارلینڈ کو اکٹھا کر رہا ہے۔ یہ تمام رہنما جمعہ کی سہ پہر نیوز کانفرنس سے خطاب کریں گے۔
کینیڈا اور امریکہ سرحد پار سے اسلحہ اور منشیات کی اسمگلنگ کے خلاف جنگ کو تیز کرنے کے لیے نئے اقدامات کا اعلان کریں گے۔ اس کے علاوہ انسانی اسمگلنگ اور فوجداری انصاف میں اصلاحات جیسے مسائل پر بھی بات چیت کی جائے گی تاکہ سخت اقدامات کیے جائیں۔