اردو ورلڈ کینیڈا ( ویب نیوز )پاکستان تحریک انصاف نے پنجاب میں 14 مئی کو ہونے والے انتخابات کے لیے باضابطہ طور پر سپریم کورٹ سے رجوع کر لیا ہے۔
تحریک انصاف کی مذاکراتی ٹیم نے سپریم کورٹ میں باضابطہ درخواست دائر کر دی ہے جس میں سپریم کورٹ سے پنجاب میں انتخابات سے متعلق 4 اپریل کے حکم پر عملدرآمد کی استدعا کی گئی ہے۔پی ٹی آئی کی جانب سے دائر درخواست میں کہا گیا ہے کہ سپریم کورٹ نے 19 اپریل کو اپنے حکم نامے میں آئین سے انحراف کو روکنے کے لیے سیاسی جماعتوں کے درمیان مذاکرات کے ذریعے انتخابات کرانے کے لیے لائحہ عمل تیار کرنے کی تجویز دی تھی۔

 مذاکرات کا تیسرا سیشن ، فریقین دو نکات پر متفق ہوگئے،الیکشن تاریخ فائنل نہ ہوسکی

درخواست میں کہا گیا ہے کہ تحریک انصاف نے عدالت میں دی گئی یقین دہانی کی روشنی میں خصوصی مذاکراتی کمیٹی قائم کی، کمیٹی وائس چیئرمین شاہ محمود قریشی، مرکزی سینئر نائب صدر چوہدری فواد حسین اور سینیٹر علی ظفر پر مشتمل تھی۔ .
جمعیت علمائے اسلام کے علاوہ پیپلز پارٹی، مسلم لیگ ن، ایم کیو ایم اور ق لیگ نے بھی اپنے نمائندے نامزد کئے۔ پی ڈی ایم کمیٹی میں وزیر خزانہ اسحاق ڈار، سینیٹر یوسف رضا گیلانی، وزیر ریلوے خواجہ سعد رفیق، وزیر تجارت نوید قمر اور دیگر شامل تھے۔

 14 مئی کو پنجاب میں الیکشن کرانا کسی صورت بھی ممکن نہیں ،الیکشن کمیشن 

درخواست میں سپریم کورٹ کو مذاکراتی عمل سے آگاہ کرتے ہوئے کہا گیا ہے کہ تحریک انصاف اور پی ڈی ایم اتحاد کی مذاکراتی ٹیموں نے 27، 28 اپریل اور 2 مئی کو نیک نیتی سے مذاکرات کیے تھے۔ تین نکات پر اتفاق رائے ہوا۔