اردو ورلڈ کینیڈا ( ویب نیوز )قائم مقام افغان وزیر خارجہ نے آرمی چیف جنرل عاصم منیر سے ملاقات کی ہے۔
پاک فوج کے شعبہ تعلقات عامہ (آئی ایس پی آر) کے مطابق قائم مقام وزیر خارجہ عامر خان متقی کی جی ایچ کیو راولپنڈی میں آرمی چیف جنرل عاصم منیر سے ملاقات کے دوران علاقائی سلامتی، بارڈر مینجمنٹ اور باہمی دلچسپی کے امور پر تبادلہ خیال کیا گیا۔
ملاقات میں سیکیورٹی کے موجودہ ماحول کو بہتر بنانے کے طریقہ کار کو بہتر بنانے پر بھی تبادلہ خیال کیا گیا۔
آرمی چیف جنرل عاصم منیر نے قائم مقام افغان وزیر خارجہ عامر خان متقی سے گفتگو کرتے ہوئے کہا کہ دہشت گردی اور انتہا پسندی کے مشترکہ چیلنجز سے نمٹنے کے لیے تعاون بڑھانا ضروری ہے۔
قائم مقام افغان وزیر خارجہ امیر خان متقی نے افغان عوام کے لیے پاکستان کی روایتی حمایت کو سراہا اور کہا کہ وہ افغانستان میں امن اور ترقی کے لیے پاکستان کی سہولت کاری کو تسلیم کرتے ہوئے علاقائی استحکام اور خوشحالی کے لیے پاکستان کے ساتھ مل کر کام کرنا چاہتے ہیں۔
پاک فوج کے سربراہ اور قائم مقام افغان وزیر خارجہ نے دوطرفہ تعلقات کو مضبوط بنانے اور مشترکہ مسائل کے حل کے لیے رابطے برقرار رکھنے پر اتفاق کیا۔آرمی چیف جنرل عاصم منیر نے بھی مستحکم، پرامن اور خوشحال افغانستان کے لیے پاکستان کے عزم کا اعادہ کیا۔
