اردو ورلڈ کینیڈا ( ویب نیوز )پی آئی اے کا طیارہ خراب موسم کے باعث راستہ بھول کر بھارت کی فضائی حدود میں داخل ہوگیا۔
میڈیا رپورٹس کے مطابق قومی ایئرلائن کی پرواز پی کے 248 4 مئی کو رات 8 بجے مسقط سے لاہور پہنچی۔ پائلٹ نے علامہ اقبال ایئرپورٹ پر لینڈ کرنے کی کوشش کی تاہم شدید بارش کے باعث طیارہ لینڈ نہ کرسکا۔

ائیر ٹریفک کنٹرولر کی ہدایت پر پائلٹ گو راؤنڈ پر گیا اور تیز بارش اور کم اونچائی کے باعث پائلٹ اپنا راستہ بھول گیا اور پنجاب کے بڈھانہ تھانے سے ہندوستان کی فضائی حدود میں داخل ہو گیا۔ پی آئی اے کا طیارہ 10 منٹ تک بھارتی فضائی حدود میں رہا اور بھارتی پنجاب کے اوپر 125 کلومیٹر کا سفر کرنے کے بعد پاکستان واپس آگیا۔
خراب موسم کے باعث پی آئی اے کا طیارہ بھارتی فضائی حدود میں پرواز کے دوران لاہور اور دہلی ایریا کنٹرول کے درمیان رابطہ میں تھا۔ پی آئی اے کا طیارہ ملنے والی ہدایات پر ملتان پہنچ گیا۔