اردو ورلڈ کینیڈا ( ویب نیوز)سابق وزیراعظم اور پاکستان تحریک انصاف کے سربراہ عمران خان کی گرفتاری کے بعد امریکا، برطانیہ، کینیڈا اور یورپی یونین نے ٹریول ایڈوائزری جاری کردی۔

غیر ملکی میڈیا کے مطابق ٹریول ایڈوائزری میں کہا گیا ہے کہ شہری آزاد کشمیر، بلوچستان اور خیبرپختونخوا میں غیر ضروری سفر سے گریز کریں۔
اس حوالے سے کینیڈین ہائی کمیشن کا کہنا ہے کہ دہشت گردی، بدامنی اور اغوا کا خطرہ ہے، مغربی طرز کے ریسٹورنٹس اور شاپنگ سینٹرز میں احتیاط برتنی چاہیے۔
کینیڈین ہائی کمیشن کی جانب سے جاری ٹریول ایڈوائزری میں کہا گیا ہے کہ اسلام آباد، راولپنڈی، لاہور اور کراچی میں سکیورٹی فورسز ہائی الرٹ ہیں، شہری ان علاقوں میں جانے سے گریز کریں جہاں مظاہرے ہورہے ہیں۔
واضح رہے کہ گزشتہ روز نیب نے سابق وزیراعظم عمران خان کو القادر ٹرسٹ کیس میں اسلام آباد ہائی کورٹ کے احاطے سے گرفتار کیا تھا جس کے بعد ملک بھر کے مختلف شہروں میں پی ٹی آئی کے کارکنان سراپا احتجاج ہیں۔