اردوورلڈ کینیڈا ( ویب نیوز )وزیر اعظم شہباز شریف نے کہا ہے کہ میرٹ پر آرمی چیف بننے والے جنرل سید عاصم منیر کے خلاف عمران خان کی توہین آمیز گفتگو بدنیتی کے سوا کچھ نہیں۔
اپنے ایک بیان میں وزیر اعظم شہباز شریف نے سابق وزیر اعظم عمران خان کی جانب سے آرمی چیف پر الزامات کی شدید مذمت کرتے ہوئے کہا کہ عمران نیازی کا بیان پاک فوج کے خلاف ان کی پست ذہنیت کا ایک اور ثبوت ہے۔
انہوں نے کہا کہ یہ وہی ذہنیت ہے جس نے محب وطن فوجی افسران پر قتل کا جھوٹا الزام لگایا، جھوٹی کہانیاں اور غیر ملکی سازشیں گھڑیں۔ 9 مئی کو جو ہوا وہ عمران نیازی کے کہنے پر ہوا۔
وزیراعظم نے کہا کہ یہ بیان اس بات کا ثبوت ہے کہ شہداء اور غازیوں کی یادگاروں کی بے حرمتی اور حساس تنصیبات اور عمارتوں پر حملے کی منصوبہ بندی عمران خان کی تھی۔ نیازی، ان کی اہلیہ، فرح گوگی اور پی ٹی آئی کی سینئر قیادت بدترین کرپشن سے آگاہ ہے۔
شہباز شریف کا مزید کہنا تھا کہ دہشت گردی کے خلاف لڑنے والی بہادر فوج کے کمانڈر کے خلاف اس قسم کی نازیبا گفتگو دہشت گردوں کی حمایت کر رہی ہے، پوری قوم مسلح افواج اور آرمی چیف کے ساتھ کھڑی ہے۔
