اردو ورلڈ کینیڈا ( ویب نیوز )اسلام آباد ہائیکورٹ نے پولیس کو تحریک انصاف کے رہنما فواد چوہدری کو آج (منگل کو )اسلام آباد ہائیکورٹ میں پیش کرنے کا حکم دے دیا۔پیر کو اسلام آباد ہائی کورٹ میں پی ٹی آئی رہنما فواد چوہدری کی نظر بندی کے خلاف کیس کی سماعت ہوئی، کیس کی سماعت جسٹس میاں گل حسن اورنگزیب کی۔فواد چوہدری فواد چوہدری کی اہلیہ حبہ چوہدری اوروکیل فیصل چوہدری عدالت میں پیش ہوئے۔

فواد چوہدری کے وکیل فیصل چوہدری نے عدالت میں موقف پیش کیا کہ فواد چوہدری کو اسلام آباد ہائیکورٹ نے حفاظتی ضمانت دی تھی، اسلام آباد ہائیکورٹ نے ان کی گرفتاری سے روکا تھا۔وکیل فیصل چوہدری نے موقف اختیار کیا کہ آئی جی اسلام آباد عدالت میں تھے اور عدالت نے کہا تھا ان فواد چوہدری کو گرفتار نہ کریں، 10 مئی کو فواد چوہدری کو گرفتار کیا گیا اور وہ پورا دن سپریم کورٹ میں موجود رہے، انہیں 3 ایم پی او کے تحت نظر بند کیا گیا۔

جسٹس میاں گل حسن اورنگزیب نے ریمارکس دیئے کہ آپ کی درخواست ابھی فکس نہیں ہے۔عدالت نے اسلام آباد پولیس کو فواد چوہدری کو آج (منگل کو)اسلام آباد ہائیکورٹ میں پیش کرنے کا حکم دے دیا، اور فریقین کو نوٹسز جاری کرتے ہوئے آج (منگل تک) جواب طلب کر لیا۔