اردو ورلڈ کینیڈا ( ویب نیوز )قومی سلامتی کمیٹی کے اجلاس میں فوجی اور نجی املاک کو نقصان پہنچانے والوں کے خلاف قانونی کارروائی کا فیصلہ کیا گیا۔
وزیراعظم شہباز شریف کی زیر صدارت قومی سلامتی کمیٹی کا اجلاس ہوا جس میں وفاقی وزرا اور اعلی عسکری قیادت نے شرکت کی۔
ذرائع کا کہنا ہے کہ اجلاس میں 9 مئی کے پرتشدد واقعات کے نقصانات اور کارروائیوں کے حوالے سے بریفنگ دی گئی۔
ذرائع کے مطابق قومی سلامتی کمیٹی کے اجلاس میں 9 مئی کے پرتشدد واقعات کی شدید مذمت کرتے ہوئے فیصلہ کیا گیا کہ فوجی اور نجی املاک کو نقصان پہنچانے والوں کے خلاف قانونی کارروائی کی جائے گی۔
ذرائع کا کہنا ہے کہ قومی سلامتی کمیٹی نے کہا کہ سیاسی مقاصد کی آڑ میں فوجی املاک کو نقصان پہنچایا گیا، قومی دفاع اور سیکیورٹی اداروں پر حملے ناقابل قبول ہیں۔
ذرائع کے مطابق وزیراعظم کا کہنا تھا کہ سیاسی مقاصد کے لیے اداروں پر حملہ افسوسناک ہے، قومی وقار رکھنے والے جناح ہا ئوس کو آگ لگا دی گئی، جو دشمن 75 سال میں نہیں کرسکا وہ کارکنوں نے کر دکھایا
انہوں نے کہا کہ پاک افواج نے پرتشدد واقعات میں تحمل کا مظاہرہ کیا ہے جو کہ قابل تحسین ہے، پوری قوم مسلح افواج کے ساتھ یکجہتی کے ساتھ کھڑی ہے۔
