اردو ورلڈ کینیڈا ( ویب نیوز )چیف الیکشن کمشنر سکندر سلطان راجہ وزیراعلیٰ آفس پہنچے، وزیراعلیٰ پنجاب محسن رضا نقوی نے ان کا استقبال کیا۔
وزیراعلیٰ پنجاب محسن نقوی اور چیف الیکشن کمشنر سکندر سلطان راجہ کی زیر صدارت اعلیٰ سطح کا اجلاس ہوا جس میں الیکشن کمیشن کے رکن سندھ نثار احمد درانی، رکن بلوچستان شاہ محمد جتوئی، رکن کے پی کے جسٹس (ر) اکرام اللہ خان نے شرکت کی۔ ممبر پنجاب بابر حسن بھروانہ، سیکرٹری الیکشن کمیشن عمر حمید خان، سپیشل سیکرٹری الیکشن کمیشن ظفر اقبال حسین، صوبائی الیکشن کمشنر پنجاب سعید گل نے شرکت کی۔
اس موقع پر چیف سیکرٹری پنجاب، انسپکٹر جنرل پولیس، ایڈیشنل چیف سیکرٹری، ایڈیشنل آئی جی سپیشل برانچ، ایڈیشنل چیف سیکرٹری داخلہ، سیکرٹری قانون، سیکرٹری پراسیکیوشن، سی سی پی او لاہور اور ایڈیشنل آئی جی سی ٹی ڈی بھی موجود تھے۔
اجلاس میں 9 مئی کے پرتشدد واقعات کی شدید مذمت کی گئی اور پاک فوج کے ساتھ مکمل یکجہتی کا اظہار کیا گیا۔ اجلاس میں چیف الیکشن کمشنر اور ارکان کو پیغامات کی تصاویر، ویڈیوز اور شواہد بھی دکھائے گئے۔
انسپکٹر جنرل پولیس ڈاکٹر عثمان انور نے چیف الیکشن کمشنر اور ارکان کو 9 مئی کو جناح ہاؤس اور دیگر فوجی تنصیبات پر حملوں کی تفصیلات سے آگاہ کیا
اجلاس کو بتایا گیا کہ 3 روز میں تشدد کے کل 256 واقعات ہوئے، فوجی تنصیبات اور مقامات کو خصوصی طور پر نشانہ بنایا گیا، شرپسندوں نے 108 گاڑیوں اور پولیس اور دیگر اداروں کی 23 عمارتوں کو نقصان پہنچایا، پرتشدد واقعات میں 5 افراد جاں بحق ہوئے۔ 127 پولیس افسران اور جوان اور 15 عام شہری زخمی ہوئے۔
اس موقع پر نگراں وزیراعلیٰ نے کہا کہ 9 مئی کو سیاسی جماعت نے پوری پاکستانی قوم کو شرمسار کر دیا، فوجی تنصیبات پر حملے باقاعدہ منصوبہ بندی کے تحت کیے گئے، حملہ آوروں اور زمان میں موجود سیاسی قیادت کے درمیان جیو فینسنگ کے ذریعے رابطہ کیا گیا۔ پارک رابطوں کے شواہد سامنے آگئے، سیاست کی آڑ میں گھناؤنا
کھیل کھیلا گیا اور ابتدائی اندازوں کے مطابق 600 کروڑ کا نقصان ہوا ہے۔
اجلاس کے دوران چیف الیکشن کمشنر سکندر سلطان راجہ نے کہا کہ نگراں وزیر اعلیٰ محسن نقوی کی قیادت میں پنجاب حکومت نے موجودہ حالات کے تناظر میں عوام کے تحفظ کے لیے بہترین اور دلیرانہ اقدامات کیے ہیں۔ اپنے فرائض ایمانداری سے ادا کریں، آپ کو کسی دباؤ میں آنے کی ضرورت نہیں، ہم آپ کے ساتھ ہیں۔
