اردوورلڈ کینیڈا ( ویب نیوز)نگران پنجاب حکومت نے دہشت گردوں کو غیرمعمولی سہولیات فراہم کرنے پر جج کے خلاف ریفرنس بھیجنے کا فیصلہ کیا ہے۔
نگران وزیراعلیٰ پنجاب محسن نقوی کی زیرصدارت اجلاس ہوا جس میں 9 مئی کے واقعات میں ملوث شرپسندوں کے خلاف قانونی کارروائی کی پیش رفت کا جائزہ لیا گیا جب کہ واقعات میں ملوث ملزمان کی نشاندہی پر نقد انعامات کی منظوری دی گئی۔
اجلاس میں آئی ایس آئی کے دفتر پر حملے میں نامزد ملزمان کی غیر قانونی سہولت کاری پر تشویش کا اظہار کیا گیا۔
اجلاس میں فیصلہ کیا گیا کہ دہشت گردوں کو غیر معمولی سہولت فراہم کرنے پر جج کے خلاف ریفرنس بھیجا جائے گا جب کہ نامزد ملزمان کی غیر قانونی اور غیر آئینی سہولت کاری کے فیصلے کو بھی چیلنج کیا جائے گا۔
اجلاس میں کہا گیا کہ نامزد ملزمان کی سہولت کاری انصاف کے قتل کے مترادف ہے۔
نگرا ن وزیراعلیٰ پنجاب نے شرپسندوں کے خلاف درج مقدمات کی مکمل پیروی کا حکم دیتے ہوئے کہا کہ مفرور شرپسندوں کی جلد از جلد گرفتاری کو یقینی بنایا جائے۔ 9 مئی کا دن پاکستان کی تاریخ کا ایک سیاہ باب ہے۔
