اردو ورلڈ کینیڈا ( ویب نیوز ) عمران کی سیکورٹی بڑھا دی گئی ،زمان پارک کے اطراف 200پولیس اہلکار تعینات

چیئرمین پاکستان تحریک انصاف اور سابق وزیراعظم عمران خان کی سیکیورٹی بڑھا دی گئی ہے۔چیئرمین پی ٹی آئی کی سیکیورٹی میں زمان پارک کے اطراف سیکیورٹی بڑھا دی گئی، اس سلسلے میں ایس پی سول لائنز حسن جاوید بھٹی نے زمان پارک کا دورہ کیا اور عمران خان کی سیکیورٹی پر مامور اہلکاروں کو ہدایات دیں۔

اس سے قبل لاہور کے علاقے زمان پارک میں عمران خان کی سیکیورٹی کے لیے 106 اہلکار تعینات کیے گئے تھے، ایس پی سول لائنز کے مطابق چیئرمین پی ٹی آئی کی سیکیورٹی پر مامور اہلکاروں کی تعداد 200 کردی گئی ہے۔

دوسری جانب پاکستان تحریک انصاف کے چیئرمین اور سابق وزیراعظم عمران خان کی رہائش گاہ زمان پارک جانے والی سڑکیں کھول دی گئیں۔

پولیس نے زمان پارک کے اطراف کی سڑکوں پر لگائے گئے کنٹینرز اور کیمپ ہٹا دیے، کلیئر ہونے والی گرین بیلٹ پر نئے پودے بھی لگائے گئے۔