اردوورلڈ کینیڈا ( ویب نیوز)عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا ہے کہ حکومت آئی ایم ایف سے معاہدہ نہیں کر سکی۔
سماجی رابطے کی ویب سائٹ ٹوئٹر پر اپنے پیغام میں شیخ رشید نے کہا کہ ایک طرف معاشی خودمختاری کو داؤ پر لگا دیا گیا ہے تو دوسری طرف عوام کو غربت کے سمندر میں ڈبو دیا گیا ہے۔ تاہم میں اداروں اور عدلیہ سے اپیل کرتا ہوں کہ وہ کیرم بورڈ حکومت کو انتخابات کے لیے جانے پر مجبور کریں۔
انہوں نے کہا کہ ایسا نہ ہوا تو نہ رہے گا بانس نہ بجے گی بانسری ، ٹرین چھوٹ جائے گی، غربت کی وجہ سے چوکوں میں ڈاکو ہوتے ہیں، مشکلات اور آفات کے وقت لیڈر ان کے ساتھ ہوتے ہیں ان لوگوں نے سیاست کے لیے ریاست کو داؤ پر لگا دیا ہے۔
ایک طرف معاشی خودمختاری داؤپرلگادی دوسری طرف عوام کوغربت کےسمندر میں ڈبودیاساری سیاسی نااہلی ناکامی حکومت کی ہےاب ملبہ کسی اورپرڈال رہی ہےمیں اداروں اورعدلیہ سےاپیل کرتا ہوں کیرم بورڈحکومت کو الیکشن کیطرف جانےپرمجبورکریں ورنہ نہ رہےگابانس نہ بجےگی بانسری ٹرین چھوٹ جائے گی
— Sheikh Rashid Ahmed (@ShkhRasheed) June 15, 2023
سابق وفاقی وزیر نے کہا کہ پاکستان میں معیشت تباہ ہو چکی ہے، بلومبرگ نے کہا کہ ڈیفالٹ ہونے والے ہیں، 50 فیصد ٹیکسٹائل فیکٹریاں بند ہیں، 11 فیصد ترسیلات کم ہیں، مہنگائی میں 50 فیصد اضافہ ہوا ہے، ڈیجیٹل اکاؤنٹ غائب ہے، 10 لاکھ لوگ بے روزگار ہیں اور 10 کروڑ لوگ غربت کی لکیر سے نیچے ہیں
شیخ رشید کا مزید کہنا تھا کہ غیر ملکی کمپنیاں ملک چھوڑ کر جا رہی ہیں، انہیں 5 ڈالر کی خیرات نہیں مل رہی، وہ بے مقصد غیر ملکی دوروں پر ہیں، حکومت رات گئے بے گناہ کارکنوں کو گھروں سے اٹھا رہی ہے۔
