اردو ورلڈ کینیڈا ( ویب نیوز )  سابق وزیر خزانہ ڈاکٹر حفیظ پاشا نے کہا ہے کہ پاکستان کے زرمبادلہ کے ذخائر ملکی ضروریات کے لیے درکار رقم سے 14 ارب ڈالر کم کی سطح پر ہیں، اس کے علاوہ ڈالر کے مقابلے روپے کی قدر 322 تک پہنچ جائے گی۔

سابق وزیر خزانہ ڈاکٹر حفیظ پاشا نے اپنی کتاب کی تقریب رونمائی سے خطاب کیا، اس موقع پر ان کی اہلیہ وزیر مملکت برائے خزانہ ڈاکٹر عائشہ پاشا بھی موجود تھیں۔جرمنی کے معروف تھنک ٹینک  کے زیراہتمام شائع ہونے والی اپنی کتاب ‘پاکستانی معیشت کے نازک مسائل  سے خطاب کرتے ہوئے ڈاکٹر حفیظ پاشا نے کہا کہ روپے کی شرح مبادلہ اور زرمبادلہ کے ذخائر تشویش ناک ہیں۔

یہ بھی پڑھیں

زرمبادلہ کے ذخائر میں 6 ہفتوں کے بعد کمی

پاکستان میں اس وقت بیروزگاری 11 فیصد کی بلند ترین سطح پر ہے جبکہ غربت بھی اپنی بلند ترین سطح پر ہے جہاں اس وقت 10 کروڑ لوگ خط غربت سے نیچے زندگی گزارنے پر مجبور ہیں۔ حفیظ پاشا نے کہا کہ پاکستان کے زرمبادلہ کے ذخائر اس وقت ملکی ضروریات سے 14 ارب ڈالر کم ہیں۔

انہوں نے  بتایا  کہ ڈالر کے مقابلے میں روپے کی قدر کا اندازہ ایک ماہ کی درآمدی صورتحال کی بنیاد پر لگایا گیا ہے جس کے مطابق ایک ڈالر کی سطح 322 روپے کے برابر ہونی چاہیے اور اگر پاکستان کی زرمبادلہ کے ذخائر ڈیڑھ ماہ کا درآمدی بوجھ برداشت کرنے کے قابل ہیں، ایک ڈالر کی قیمت 264 روپے کے برابر ہو گی۔