اردوورلڈ کینیڈا( ویب نیوز )پاکستان تحریک انصاف نے پرویز خٹک پر ارکان کو بغاوت پر اکسانے کا الزام لگاتے ہوئے ان کے خلاف کارروائی شروع کر دی ہے۔
پی ٹی آئی کے مرکزی سیکرٹری جنرل عمر ایوب نے پرویز خٹک کو شوکاز نوٹس جاری کرتے ہوئے پوچھا ہے کہ وہ پارٹی ارکان کو پارٹی چھوڑنے پر کیوں اکسا رہے ہیں۔

جنرل سیکرٹری نے پرویز خٹک سے 7 دن میں جواب طلب کیا اور تسلی بخش جواب نہ دینے پر قانونی کارروائی کا عندیہ بھی دیا۔
نوٹس میں کہا گیا ہے کہ جماعت کے علم میں آیا ہے کہ آپ ممبران سے روابط قائم کرکے جماعت کو چھوڑنے پر اکسا رہے ہیں، پرویز خٹک اس تاثر پر 7 روز میں اپنا تفصیلی جواب داخل کریں۔
واضح رہے کہ گزشتہ ماہ پرویز خٹک نے اسلام آباد میں ایک مقام پر پریس کانفرنس کرتے ہوئے پی ٹی آئی کے تمام عہدوں سے مستعفی ہونے کا اعلان کیا تھا اور 9 مئی کے واقعات کی مذمت کرتے ہوئے شرپسندوں کے خلاف کارروائی کا مطالبہ بھی کیا تھا۔
بعد ازاں پرویز خٹک نے پی ٹی آئی سے علیحدگی کی خبروں کی تردید کرتے ہوئے کہا کہ وہ پی ٹی آئی کا حصہ ہیں لیکن عہدوں سے استعفیٰ دے چکے ہیں۔