اردوورلڈ کینیڈا ( ویب نیوز )عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا ہے کہ اسحاق ڈار یا ان کے کسی دوست کو سامنے لائیں، یہ قوم اب سب کچھ سمجھتی ہے اور وقت آنے پر درست فیصلہ کرے گی۔
سماجی رابطے کی ویب سائٹ ٹوئٹر پر اپنے بیان میں شیخ رشید احمد نے کہا کہ ان کے پاس 15 دن رہ گئے ہیں کہ وہ لیپ ٹاپ کی لوٹ سیل لگائیں یا پھر نگران وزیراعظم کے اختیارات میں اپنی مرضی کے مطابق ترمیم کریں
15 دن رہ گئے ہیں بے شک لیپ ٹاپ کی لوٹ سیل لگادیں بے شک اپنی مرضی کے مطابق نگران وزیراعظم کے اختیار کی ترمیم کروالیں ارکین اسمبلی کو ترقیاتی کاموں کے لیے 50ارب روپے کی بجائے 100 ارب بھی جاری کریں تو ووٹ ترقیاتی کاموں کا نہیں عزت نفس کا ہے لوگوں کو تو مہنگائی اور بجلی کا بل مار…
— Sheikh Rashid Ahmed (@ShkhRasheed) July 27, 2023
سابق وفاقی وزیر نے کہا کہ عوام مہنگائی اور بجلی کے بلوں کی زد میں آچکے ہیں، ترقیاتی کام کیسے کریں گے، آٹے اور چینی کی مہنگائی کا پھندا بہت ہوگیا، اب بجلی کی مہنگائی کا ایک اور پھندا عوام کے گلے میں ڈال دیا گیا ہے۔ اس مہنگی بجلی پر کون سی صنعت چل سکتی ہے؟
انہوں نے کہا کہ خودکشیاں، بھوک، آئین و قانون کی بے حرمتی، چادر اور چاردیواری کی تباہی حکومت کا سیاسی قبرستان بنا دیں گے، آٹے، چینی، بجلی سے کھیلنے والے آئین و قانون آپ کے 14 طبق روشن کریں گے۔ ، اللہ کے ہاں کوئی تاخیر نہیں، کوئی اندھیرا نہیں، اپنی پسند کا نگران وزیراعظم لائیں، اپنی پسند کا انتخابی نشان منتخب کریں، الیکشن ہوئے تو شکست آپ کا مقدر ہے۔
عوامی مسلم لیگ کے سربراہ کا مزید کہنا تھا کہ آپ نے 15 ماہ میں سیاسی مخالفین پر جو مظالم ڈھائے ہیں اس کی پاکستان میں مثال نہیں ملتی، جیلیں بے گناہ لوگوں سے بھری پڑی ہیں، تھانے جھوٹے مقدمات سے بھرے پڑے ہیں، فسطائیت، دہشت گردی اور لوٹ مار کا گرم بازار جلد بند ہونے والا ہے اور عوام اپنا حق لے کر رہیں گے۔
