اردوورلڈ کینیڈا ( ویب نیوز )الیکشن کمیشن نے صاف اور شفاف انتخابات کے لیے نگرا ن حکومتوں کو ہدایات جاری کرتے ہوئے کہا ہے کہ قومی اسمبلی، سندھ اور بلوچستان اسمبلیاں تحلیل کر دی گئی ہیں۔

الیکشن کمیشن نے اپنے خط میں کہا کہ صاف، شفاف اور بروقت انتخابات کو یقینی بنانا الیکشن کمیشن کا کام ہے۔خط میں کہا گیا ہے کہ ہر سیاسی جماعت کو لیول پلیئنگ فیلڈ دی جائے، نگران حکومتیں منصفانہ اور شفاف انتخابات کے لیے الیکشن کمیشن کی معاونت کو یقینی بنائیں، الیکشن کمیشن کی پیشگی اجازت کے بغیر تقرریاں اور تبادلے نہ کیے جائیں۔
الیکشن کمیشن نے وفاقی، صوبائی اور مقامی اداروں میں ہر قسم کی بھرتی اور ترقیاتی اسکیموں پر پابندی عائد کردی، الیکشن کمیشن نے اداروں میں بھرتی ہونے والی سیاسی شخصیات کی ملازمتیں ختم کرنے کا حکم دے دیا۔
الیکشن کمیشن نے وزیراعظم، وزرائے اعلیٰ، کابینہ کے ارکان، مشیروں اور اراکین اسمبلی کو بھی اپنی سرکاری رہائش گاہیں خالی کرنے کی ہدایت کی۔