اردوورلڈ کینیڈا( ویب نیوز )بھارت کی جانب سے چھوڑے گئے پانی سے دریائے ستلج میں اونچے درجے کا سیلاب آگیا جس کے بعد ہائی الرٹ جاری کر دیا گیا۔
پراونشل ڈیزاسٹر مینجمنٹ اتھارٹی (پی ڈی ایم اے) پنجاب کے ترجمان نے بتایا کہ دریائے ستلج میں سیلابی صورتحال بہت زیادہ ہے۔
گنڈا سنگھ کے مقام پر پانی کی سطح 23 فٹ تک بلند ہے اور بہاؤ 278,000 کیوسک ہے۔ ہیڈ سلیمانکی سے 80 ہزار کیوسک پانی گزر رہا ہے۔

امدادی کاموں کے لیے پاک فوج کو طلب کر لیا گیا ہے۔ دریائی پٹی کے 21 اضلاع کے 53 ہزار سے زائد لوگوں کو فوری طور پر نقل مکانی کی ہدایت کی گئی ہے۔
لالیکا، چاویکا، وزیرکا، کوٹ مخدوم، بونگہ احسان، کاکو بودلہ، پیرسکندر، کالیا شاہ، جودھیکا اور دیگر علاقوں سے نقل مکانی کا سلسلہ جاری ہے۔ اب تک 4805 افراد کو محفوظ مقامات پر منتقل کیا جا چکا ہے۔
ترجمان پی ڈی ایم اے کے مطابق بھارت کی جانب سے 21 اگست تک روزانہ کی بنیاد پر پانی چھوڑے جانے کی اطلاعات ہیں۔
منگلا ڈیم میں پانی کی سطح انتہائی بلند ہوگئی۔ بیلی قبیلہ کا رہائشی دریائے ستلج میں ڈوب کر جاں بحق ہوگیا جس کی لاش نکال لی گئی ہے۔