اردوورلڈ کینیڈا( ویب نیوز)لائن آف کنٹرول پر بھارتی فوج کی بلا اشتعال فائرنگ سے ایک بزرگ شہری شہید ہوگیا۔آئی ایس پی آر کے مطابق پیر کو بھارتی فوج نے نکیال سیکٹر میں بلا اشتعال فائرنگ کر کے معصوم شہریوں کو نشانہ بنایا جس کے نتیجے میں ضلع کوٹلی کے گاؤں اولی کا رہائشی 60 سالہ غیاث نامی بزرگ شہید اور 3 خواتین زخمی ہوگئیں

آئی ایس پی آر کا کہنا ہے کہ بھارتی جارحیت موجودہ سیز فائر معاہدے کی کھلم کھلا خلاف ورزی ہے۔ پاکستان اپنی سرحدوں پر امن کا خواہاں ہے اپنے شہریوں کے جان و مال کے تحفظ کے لیے تمام ضروری اقدامات اٹھائے جائیں گے۔

پاک فوج کے بیان میں مزید کہا گیا ہے کہ بھارت کی جانب سے پاکستانی عوام کے خلاف کسی بھی مہم جوئی کا اس کی پسند کے وقت اور جگہ پر سخت جواب دیا جائے گا۔