اردوورلڈ کینیڈا ( ویب نیوز)نگران وزیراعظم انوار الحق کاکڑ سے بلوچستان کے قبائلی عمائدین نے ملاقات کی۔تفصیلات کے مطابق ملاقات میں قبائلی عمائدین کے وفد نے وزیراعظم کو وزارت عظمیٰ کا عہدہ سنبھالنے پر مبارکباد دی اور نیک خواہشات کا اظہار کیا۔

نگران وزیراعظم نے تمام قبائلی عمائدین کا شکریہ ادا کیا اور ان کے علاقے کے مسائل سننے کے بعد وزیراعظم نے اس بات کا اعادہ کیا کہ وہ بلوچستان کے مسائل کے حل کے لیے اپنی تمام تر توانائیاں بروئے کار لائیں گے۔
وزیراعظم نے کہا کہ بلوچستان کی ترقی کے بغیر پاکستان کی ترقی ممکن نہیں، حکومت بلوچستان میں بیرونی سرمایہ کاری بڑھانے، زرعی اور صنعتی شعبے کی ترقی اور روزگار کی فراہمی کے لیے ترجیحی بنیادوں پر اقدامات کرے گی۔
نگران وزیراعظم نے کہا کہ حکومت بلوچستان کے نوجوانوں کو ترقی کے یکساں مواقع فراہم کرے گی، نگران حکومت ملکی معیشت کی ترقی میں بلوچستان کا کردار بڑھانے کے لیے انفراسٹرکچر، بجلی، پانی اور تمام ضروری وسائل فراہم کرنے کی کوشش کرے گی۔
ملاقات میں گورنر بلوچستان عبدالولی کاکڑ اور نگران وزیراعلیٰ علی مردان ڈومکی بھی موجود تھے۔