اردوورلڈ کینیڈا ( ویب نیوز )نگران وزیراعظم انوار الحق کاکڑ کی زیر صدارت وفاقی کابینہ کا اجلاس ہوا، جس میں بجلی صارفین کو ریلیف دینے کے اقدامات کا جائزہ لیا گیا۔وفاقی کابینہ کے اجلاس میں 400 یونٹ تک بجلی استعمال کرنے والے صارفین کو ریلیف دینے کا فیصلہ کیا گیا ہے، 400 یونٹ تک کے بجلی کے بل آئندہ 6 ماہ میں قسطوں میں وصول کیے جائیں گے۔
ذرائع کے مطابق ریلیف کی منظوری آئی ایم ایف سے لی جائے گی، آئی ایم ایف کی منظوری کے بعد ریلیف کا اعلان کیا جائے گا۔

قبل ازیں نگرا ن وزیراعظم انوار الحق کاکڑ کی زیر صدارت نگراں وفاقی کابینہ کے اجلاس میں ملک کی معاشی صورتحال، بجلی کے بلوں پر عوامی احتجاج اور پاور ڈویژن کے فارمولے پر غور کیا گیا۔ یونٹس کی سپلائی اور منیٹائزیشن پر بریفنگ دی گئی۔
بریفنگ کے دوران پاور ڈویژن کی جانب سے اراکین کو بتایا گیا کہ گریڈ 17 سے 21 تک کے 15 ہزار 971 ملازمین ماہانہ 7 ملین یونٹ مفت بجلی استعمال کرتے ہیں، گریڈ 1 سے 16 تک کے ملازمین ماہانہ 33 کروڑ یونٹ مفت بجلی استعمال کر رہے ہیں جبکہ 1. ایک لاکھ 73 ہزار 200 سرکاری ملازمین سالانہ 10 ارب کی مفت بجلی استعمال کرتے ہیں۔
بریفنگ میں بتایا گیا کہ گریڈ 17 سے 21 تک کے ملازمین سالانہ 1 ارب 25 کروڑ روپے کی مفت بجلی استعمال کرتے ہیں جبکہ گریڈ 1 سے 16 تک کے ملازمین ماہانہ 76 کروڑ 43 لاکھ روپے کی مفت بجلی استعمال کرتے ہیں۔