اردوورلڈ کینیڈا ( ویب نیوز )نگران وزیراعظم انوارالحق کاکڑ نے کہا ہے کہ بجلی کے زائد بلوں میں ٹیکسوں کا ناہموار نظام مسئلہ کی نشاندہی کر رہا ہے اور ٹیکسوں کے اس ناہموار نظام پر کسی نے توجہ نہیں دی۔
ایک بیان میں انوار الحق کاکڑ نے کہا کہ نگران کابینہ میں بہتر افراد کا انتخاب کیا گیا ہے، ممالک میں مشکل حالات آتے رہے ہیں، اسرائیل میں 1970 میں مہنگائی 1000 فیصد بڑھی تھی۔

انہوں نے کہا کہ نگرا ن حکومت معاشی مسائل کے حل کے لیے کوشاں ہے اور اس تناظر میں خصوصی سرمایہ کاری سہولت کونسل کا مقصد سرمایہ کاری کو فروغ دینا ہے۔ سرمایہ کاری کے لیے اہم شعبوں کی نشاندہی کی گئی ہے۔
نگران وزیراعظم نے کہا کہ بجلی کے بلوں میں اضافے کے ذمہ داروں کا تعین کیا جائے گا، لیکن سوال یہ ہے کہ آج بجلی کے ان بلوں کے مسئلے کا حل کیا ہے؟ بجلی کے زائد بلوں میں ٹیکس کا غیر مساوی نظام بھی اس مسئلے کی نشاندہی کر رہا ہے اور اس ناہموار ٹیکسیشن سسٹم پر کسی نے توجہ نہیں دی۔
انوار الحق کاکڑ نے کہا کہ بچپن سے سنتے آ رہے ہیں کہ ہر دوسرا شخص یورپ جانا چاہتا ہے، لوگوں کا ملک سے باہر جانا کوئی نئی بات نہیں
ان کا مزید کہنا تھا کہ میرا موقف صرف اتنا ہے کہ باہر جانے والے مستقبل کا اثاثہ ہیں۔