اردوورلڈ کینیڈا ( ویب نیوز )اسلام آباد پولیس نے تحریک انصاف کے صدر اور سابق وزیر اعلیٰ پنجاب چوہدری پرویز الٰہی کو ایک بار پھر گرفتار کر لیا ہے۔

ذرائع کے مطابق چوہدری پرویز الٰہی کو 3 ایم پی او کے تحت گرفتار کیا گیا، سابق وزیراعلیٰ پنجاب کو ظہور الٰہی روڈ سے گرفتار کیا گیا۔

وفاقی پولیس چوہدری پرویز الٰہی کو گرفتار کرکے اسلام آباد روانہ ہوگئی

ذرائع نے بتایا کہ چوہدری پرویز الٰہی کو اسلام آباد لے جا کر 3 ایم پی او کے تحت اڈیالہ جیل میں بند کر دیا جائے گا۔

اس سے قبل لاہور ہائیکورٹ میں سابق وزیراعلیٰ پنجاب کی نیب کی گرفتاری کے خلاف درخواست پر سماعت ہوئی۔

سماعت کے دوران لاہور ہائیکورٹ نے چوہدری پرویز الٰہی کو رہا کرنے اور مزید کسی مقدمے میں گرفتار نہ کرنے کا حکم دیا۔

لاہور ہائی کورٹ کی جانب سے چوہدری پرویز الٰہی کی رہائی کے حکم کے بعد نیب نے سابق وزیراعلیٰ پنجاب کو دوبارہ گرفتار کرنے سے انکار کردیا جب کہ پولیس افسران نیب ٹیم سے پرویز الٰہی کی دوبارہ گرفتاری کی استدعا کرتے رہے۔

اس موقع پر نیب کے انکار پر پولیس اور نیب حکام آپس میں الجھ پڑے، نیب افسر نے کہا کہ پولیس کی وجہ سے ہم گالی نہیں سن سکتے۔

بعد ازاں نیب افسر کی ہدایت پر نیب ٹیم کے افسران اور اہلکار لاہور ہائیکورٹ سے روانہ ہوگئے۔