اردوورلڈ کینیڈا ( ویب نیو ز)لاہور چیمبر آف کامرس اینڈ انڈسٹری کے وفد سے ملاقات میں آرمی چیف جنرل عاصم منیر نے سپیشل انویسٹمنٹ فیسیلیٹیشن کونسل کے اہم کردار پر روشنی ڈالی اور تاجروں کو یقین دلایا کہ سرمایہ کاری کے فروغ کے لیے سہولیات پیدا کی جائیں گی۔
ملاقات کے بعد لاہور چیمبر آف کامرس کے صدر کاشف انور نے کہا کہ آرمی چیف نے تاجروں کو یقین دلایا ہے کہ منی ایکسچینج کو ٹیکس کے دائرے میں لایا جائے گا، جب کہ ڈالر ایکسچینج کے معاملے میں انٹربینک ریٹس میں شفافیت کو فروغ دیا جائے گا۔
لاہور چیمبر آف کامرس کے صدر نے کہا کہ ملاقات میں آرمی چیف نے اقتصادی فیصلہ سازی کو مضبوط بنانے کے لیے سعودی عرب، متحدہ عرب امارات اور کویت سمیت دیگر ممالک سے 100 ارب ڈالر تک کی سرمایہ کاری کو راغب کرنے کی صلاحیت پر زور دیا۔ انہوں نے معاشی مسائل اور مختلف شعبوں پر توجہ مرکوز کرنے والی ٹاسک فورسز کی تشکیل کا انکشاف کیا۔
کاشف انور نے بتایا کہ ملاقات میں تاجروں کے وفد نے آرمی چیف کو بجلی کے بلوں پر انکم اور سیلز ٹیکس کی شرح میں کمی کی تجویز دی اور صارفین پر مالی دباؤ کم کرنے کے لیے فیول ایڈجسٹمنٹ چارجز کی وصولی کے لیے عملی طریقہ کار بیان کیا
ملاقات میں تاجروں نے آرمی چیف سے درخواست کی کہ وہ انٹربینک اور اوپن مارکیٹ میں امریکی ڈالر کی قیمتوں کو کنٹرول کرنے پر زور دیں۔
