اردوورلڈ کینیڈا ( ویب نیوز )نگران وزیر داخلہ سرفراز احمد بگٹی نے کہا کہ ملک میں غیر قانونی طور پر مقیم غیر ملکیوں کی واپسی کے لیے جامع حکمت عملی بنائی جائے۔نگراں وزیر داخلہ سرفراز احمد بگٹی کی زیر صدارت وزیراعظم کی جانب سے دیے گئے اہداف پر اجلاس ہوا، اجلاس میں سیکریٹری انسداد منشیات ڈویژن منیر اعظم، اسپیشل سیکریٹری داخلہ ندیم محبوب، ڈی جی اے این ایف میجر جنرل محمد انیق الرحمان ملک نے شرکت کی۔ .
اجلاس میں ڈی جی ایف آئی اے محسن حسن بٹ، نیشنل کوآرڈینیٹر نیکٹا طاہر رائے اور دیگر سینئر افسران نے بھی شرکت کی۔ نگراں وزیر داخلہ نے کہا کہ ملک میں امن و امان کا قیام حکومت کی اولین ترجیح ہے، کسی بھی فرد یا گروہ کی جانب سے تشدد کی سرگرمیوں کو برداشت نہیں کیا جائے گا۔
سرفراز احمد بگٹی نے کہا کہ پاکستان میں غیر قانونی طور پر مقیم غیر ملکیوں کی واپسی کے لیے جامع حکمت عملی بنائی جائے، پاک ایران سرحد پر مزید تین بارڈر کراسنگ کھولنے کے حوالے سے ایکشن پلان جلد از جلد مکمل کیا جائے، پولیس اور سیکیورٹی ادارےان کی کارکردگی کو بہتر بنانے کے لیے ان کے دائرہ کار کا واضح تعین بہت ضروری ہے۔
وزیر داخلہ نے مزید کہا کہ سویلینز کو مسلح افواج کی بہتری کے لیے جدید ترین تربیت اور وسائل فراہم کریں گے، غیر ملکیوں کو فول پروف سیکیورٹی کی فراہمی یقینی بنائیں گے، کاروبار اور سرمایہ کاری کے لیے ویزا درخواست گزاروں کو ہر ممکن سہولت فراہم کریں گے۔
