اردوورلڈ کینیڈا ( ویب نیوز) شہباز شریف کے پرنسپل سیکریٹری رہنے والے سابق بیوروکریٹ فواد حسن فواد کو وفاقی کابینہ میں شامل کرلیا گیا۔وزیراعظم کے سابق پرنسپل سیکرٹری فواد حسن فواد کو نگراں کابینہ میں وفاقی وزیر مقرر کر دیا گیا ہے۔

صدر مملکت عارف علوی نے نگراں وزیراعظم انوارالحق کاکڑ کی ایڈوائس پر فواد حسن فواد کی تقرری کی منظوری دے دی۔

ذرائع کا کہنا ہے کہ فواد حسن فواد کو جلد وزارت کا قلمدان سونپا جائے گا۔

اس حوالے سے فواد حسن فواد نے کہا ہے کہ مجھے ابھی تک کسی محکمے کا چارج نہیں دیا گیا، کل وزیراعظم سے ملاقات کروں گا، جو بھی ذمہ داری ملی پوری ایمانداری اور محنت سے نبھانے کی کوشش کروں گا۔

انہوں نے کہا کہ میرا ماضی گواہ ہے کہ میں نے ہمیشہ قومی مفاد میں دیانتداری اور جانفشانی سے کام کیا ہے، آئندہ بھی ایسا ہی کرنے کی کوشش کروں گا اور اپنی پوری صلاحیت کے مطابق کام کروں گا۔

واضح رہے کہ نیب نے فواد حسن فواد کو آمدن سے زائد اثاثوں کے کیس میں گرفتار کیا تھا جس میں نیب ان کے خلاف کرپشن ثابت کرنے میں بری طرح ناکام رہا تھا اور عدالت نے انہیں نیب ریفرنس میں بری کردیا تھا۔