اردوورلڈ کینیڈا ( ویب نیوز)جماعت اسلامی نے پیٹرولیم مصنوعات کی قیمتوں میں اضافہ مسترد کرتے ہوئے گورنر ہاؤس کے باہر دھرنا دینے کا اعلان کیا ہے۔
امیر جماعت اسلامی سراج الحق نے کہا ہے کہ حکومت نے آئی ایم ایف کی درخواست پر پیٹرولیم مصنوعات کی قیمتوں میں اضافہ کرکے عوام کا جینا مشکل کردیا، اس صورتحال میں خاموش رہنا موت ہے، عوام گھروں سے نکلیں۔

انہوں نے کہا کہ جماعت اسلامی عوامی حمایت سے حکومت کو پیٹرولیم مصنوعات کی قیمتوں میں اضافہ واپس لینے پر مجبور کرے گی، بجلی اور پیٹرولیم مصنوعات کی قیمتوں میں اضافے کے خلاف احتجاجی تحریک چلا رہی ہے۔
سراج الحق کا مزید کہنا تھا کہ چاروں صوبوں میں گورنر ہاؤسز کے باہر عوامی دھرنے ہوں گے، عوام موت کا انتظار کرنے کے بجائے گھروں سے باہر نکلیں اور جماعت اسلامی کی تحریک کا حصہ بنیں۔
دوسری جانب پیٹرولیم مصنوعات کی قیمتوں میں اضافے پر گرینڈ ڈیموکریٹک الائنس کے رہنما سردار عبدالرحیم نے کہا ہے کہ قیمتوں میں اضافے کو مسترد کرتے ہیں۔
سردار عبدالرحیم نے کہا کہ عوام کو آئی ایم ایف کے خنجر سے مارا جا رہا ہے، پی ڈی ایم کا آئی ایم ایف معاہدہ پاکستان دشمن ثابت ہوا۔