ایبٹ آباد میں پیپلز پارٹی کے ورکرز کنونشن سے خطاب کرتے ہوئے انہوں نے کہا کہ پیپلز پارٹی محروم طبقات کی جماعت ہے، یہ جماعت عوام کی تین نسلوں کی ہے۔ زرداری نے خیبرپختونخوا کو شناخت دی، بی آئی ایس پی کے ذریعے لوگوں کی مدد کی۔
بلاول بھٹو زرداری نے کہا کہ پاکستان میں مہنگائی اور غربت تاریخی سطح پر ہے، سیاستدان، بیوروکریسی اور حکومت زمینی حقائق کو نہیں سمجھتے، مہنگائی اور غربت بہت تیزی سے بڑھ رہی ہے، پرانی جماعتیں پرانی سیاست میں مصروف ہیں۔ مسائل سے نکلنا ہے تو نئی سیاست کی طرف بڑھنا ہو گا، نوجوانوں کو آگے آنا ہو گا، نئی سیاست اور نئی قیادت کی ضرورت ہے، آج اور کل کے مسائل کا حل ہمارے منشور میں ہے۔
انہوں نے کہا کہ کسی کو دوسری یا چوتھی بار وزیراعظم بنانے سے بہتر ہے، آپ مجھے ایک موقع دیں، عوام مجھے موقع دیں، مایوس نہیں کروں گا، پیپلز پارٹی کے مدمقابل کوئی ن لیگ یا پی ٹی آئی نہیں ہمیں سوچنا ہے کہ کیا ملک کی حکومت 70 سالہ بزرگوں کے ہاتھ میں دی جائے؟ قومی مسائل کا حل اور عوام کی خدمت مشکل نہیں، صرف نیت درست ہونی چاہیے، ایک نظریہ ایک منشور ہونا چاہیے۔
چیئرمین پی پی نے کہا کہ ہمارے پاس مہنگائی اور غربت کو روکنے کا منصوبہ ہے جس کے لیے تمام جماعتوں کو مل کر کام کرنا ہوگا۔