پراونشل ڈیزاسٹر منیجمنٹ اتھارٹی نے سمارٹ لاک ڈاؤن کا نوٹیفکیشن جاری کر دیا ہے جس کے مطابق آج بروز ہفتہ 10 اضلاع لاہور، ننکانہ، شیخوپورہ، قصور، گوجرانوالہ، گجرات، سیالکوٹ، نارووال، حافظ آباد اور منڈی بہاؤالدین کو لاک ڈاؤن کیا جائے گا۔
نوٹیفکیشن کے مطابق ہفتہ کو 10 اضلاع میں نقل و حرکت پر پابندی ہوگی، تمام سرکاری و نجی اسکول، کالج اور یونیورسٹیاں بند رہیں گی اور آن لائن کلاسز کی اجازت ہوگی جب کہ بازار، دکانیں، جم، سینما ہال اور دفاتر سہ پہر 3 بجے کے بعد کھلیں گے۔
دوسری جانب لاہور میں چند روز قبل ہونے والی بارشوں کے بعد فضائی آلودگی میں اضافہ ریکارڈ کیا گیا، صوبائی دارالحکومت کو دنیا کا آلودہ ترین شہر قرار دیا گیا جہاں صبح سات بجے پارٹیکولیٹ میٹرز کی تعداد 374 ریکارڈ کی گئی۔
واضح رہے کہ بدھ کو نگراں وزیراعلیٰ پنجاب نے سموگ کی صورتحال سے نمٹنے کے لیے اہم اجلاس طلب کیا تھا، جس میں ہفتے کو اسکول، کالج اور یونیورسٹیز بند رکھنے اور کاروباری مراکز کھولنے سے متعلق فیصلے کیے گئے تھے۔
