ای سی پی نے تحریک انصاف کے انٹرا پارٹی انتخابات کو کالعدم قرار دیتے ہوئے کہا کہ پی ٹی آئی نے آئین کے مطابق انٹرا پارٹی الیکشن نہیں کرائے، پاکستان تحریک انصاف 20 روز میں دوبارہ انٹرا پارٹی الیکشن کرائے۔
فیصلے میں مزید کہا گیا کہ پی ٹی آئی الیکشن کے بعد 7 روز میں رپورٹ جمع کرائے، پارٹی الیکشن نہ کرائے تو انتخابی نشان کے لیے نااہل ہو گی۔
واضح رہے کہ الیکشن کمیشن نے پی ٹی آئی کے انٹرا پارٹی الیکشن سے متعلق 13 ستمبر کو فیصلہ محفوظ کیا تھا۔
دوسری جانب پاکستان تحریک انصاف نے الیکشن کمیشن کے فیصلے کو ہائی کورٹ میں چیلنج کرنے کا اعلان کیا ہے۔
میڈیا سے گفتگو کرتے ہوئے تحریک انصاف کے وکیل بیرسٹر گوہر نے کہا کہ الیکشن کمیشن کا فیصلہ انتہائی افسوسناک ہے، انصاف کے تقاضے پورے نہیں کیے گئے۔
انہوں نے کہا کہ پارٹی نے آئین اور قانون کے مطابق الیکشن کرائے، الیکشن کمیشن نے یہ نہیں کہا کہ پارٹی الیکشن آئین کے مطابق نہیں ہوئے بلکہ کہا کہ دستاویزات مکمل نہیں ہیں۔
