اسد شفیق نے اتوار کو نیشنل اسٹیڈیم میں اپنے کیرئیر کا آخری میچ کھیلا۔ ان کی کپتانی میں کراچی وائٹس نے نیشنل ٹی ٹوئنٹی کپ کا فائنل جیت کر آخری میچ کو اپنے لیے یادگار بنا دیا۔میچ کے بعد ان کے ساتھی کرکٹرز نے انہیں گراؤنڈ سے شاندار الوداع کیا۔ 37 سالہ اسد شفیق پی سی بی کے سلیکشن کنسلٹنٹ کے طور پر کام کریں گے۔اسد شفیق نے 77 ٹیسٹ، 60 ون ڈے اور 10 ٹی ٹوئنٹی میچز میں پاکستان کرکٹ ٹیم کی نمائندگی کی۔ انہوں نے بین الاقوامی کریئر کا آغاز جون 2010 میں بنگلہ دیش کے خلاف ون ڈے میچ سے کیا۔
اسد شفیق کے ٹیسٹ کیریئر میں 12 سنچریاں اور 27 نصف سنچریاں شامل ہیں۔ انہوں نے ٹیسٹ کیریئر میں 4 ہزار 660 رنز، ون ڈے میں 1 ہزار 336 اور ٹی ٹوئنٹی انٹرنیشنل میں 192 رنز بنائے۔چھٹی پوزیشن پر کھیلتے ہوئے سب سے زیادہ سنچریاں بنانے کا اعزاز بھی اسد شفیق کے پاس ہے۔ 2020 کے بعد سے وہ کسی بھی میچ میں قومی ٹیم میں جگہ نہیں بنا سکے۔