الجزیرہ کی رپورٹ کے مطابق غزہ میں فلسطینی پناہ گزینوں کے لیے اقوام متحدہ کے ادارے کے سربراہ نے تصدیق کی ہے کہ اسرائیلی ٹینکوں نے پناہ گاہ پر گولہ باری کی۔ اس کے علاوہ انہوں نے سماجی رابطے کی ویب سائٹ ایکس پر بھی اس واقعے کی اطلاع دی۔انہوں نے کہا کہ اسرائیلی ٹینکوں نے عمارت پر حملہ کیا جس میں 800 افراد پناہ لیے ہوئے تھے اور اب تک 9 افراد کے شہید اور 75 کے زخمی ہونے کی اطلاعات ہیں۔

اقوام متحدہ کے اہلکار نے کہا کہ اس واقعے میں ممکنہ طور پر "بڑے پیمانے پر جانی نقصان” ہوا ہے۔رفح میں قائم بین الاقوامی تنظیم کے ترجمان عدنان ابو حسنہ نے کہا کہ حملے سے قبل اسرائیلی فوج کی جانب سے کوئی وارننگ جاری نہیں کی گئی تھی۔ ابو حسنہ نے صورتحال کو "انتہائی خطرناک” قرار دیتے ہوئے کہا کہ علاقے میں اسرائیلی ٹینکوں کی موجودگی کی وجہ سے ایجنسی گزشتہ 48 گھنٹوں سے کمپاؤنڈ تک رسائی حاصل نہیں کر سکی ہے۔