اردو ورلڈ کینیڈا ( ویب نیوز ) پاکستان کی قومی ٹیم کے کپتان بابر اعظم نے کہا ہے کہ فتح کے لیے اسٹرائیک ریٹ بڑھانا ہوگا اور فتوحات کا سفر دوبارہ شروع کرنے کے لیے کھلاڑیوں کو جدید کرکٹ کھیلنا ہوگی۔
لندن میں انگلینڈ کے خلاف سیریز کے آخری اور چوتھے ٹی ٹوئنٹی میچ میں شکست کے بعد کپتان بابر اعظم نے پریس کانفرنس کرتے ہوئے کہا کہ سیریز ہارنا افسوسناک ہے، جیت کے بعد بلند حوصلے کے ساتھ ٹی ٹوئنٹی ورلڈ کپ میں جانا ضروری تھا۔ انہوں نے کہا کہ درمیانی اوورز میں بلے بازوں نے ذمہ داری کا مظاہرہ نہیں کیا اور وکٹیں گنوائیں، ایک کے بعد ایک وکٹیں گرنے سے بڑا اسکور نہیں کر سکے جب کہ بولرز نے بھی اچھی بولنگ نہیں کی اور زیادہ رنز دئیے.
انہوں نے کہا کہ اعظم خان سمیت تمام کھلاڑی میرٹ پر منتخب ہوئے، شکست کے بعد سوال اٹھتے ہیں۔بابر اعظم کا کہنا تھا کہ ورلڈ کپ بالکل مختلف کھیل ہے جس میں بہتر نتائج دیں گے، وہ امریکا کی کنڈیشنز سے واقف نہیں لیکن ویسٹ انڈیز کی کنڈیشنز سے بخوبی واقف ہیں۔کپتان بابر اعظم نے کہا کہ تمام کھلاڑی اپنا کردار جانتے ہیں، ورلڈ کپ میں تمام کھلاڑیوں کو ذمہ داری نبھانی ہوگی۔
