اردو ورلڈ کینیڈا ( ویب نیوز ) مانچسٹر ایئرپورٹ پر پاکستانی نوجوان پر پولیس کی جانب سے تشدد کا نشانہ بننے کی ویڈیو وائرل ہونے کے بعد کمیونٹی میں تشویش کی لہر دوڑ گئی ہے۔گریٹر مانچسٹر پولیس کا کہنا ہے کہ انہیں ہوائی اڈے پر لڑائی کی اطلاع پر بلایا گیا تھا، وہ اس واقعے سے آگاہ ہیں، اور انہوں نے تحقیقات کا آغاز کر دیا ہے۔ویڈیو میں پولیس افسر کو زمین پر گرنے والے شخص کو لات مارتے ہوئے دیکھا جا سکتا ہے۔میڈیا رپورٹ کے مطابق زمین پر گرنے والے شخص کے پاس ایک خاتون بھی بیٹھی ہوئی تھی جب کہ دیگر پولیس اہلکار تماشائیوں کو پیچھے ہٹنے کو کہتے رہے۔
میڈیا رپورٹ کے مطابق پولیس اچانک قریبی بنچ پر بیٹھے ایک شخص پر چڑھ دوڑی اور اسے بھی تشدد کا نشانہ بنایا۔مانچسٹر ایئرپورٹ پر پاکستانی نوجوان پر تشدد کے واقعے پر ردعمل دیتے ہوئے مانچسٹر سے برطانوی پاکستانی رکن پارلیمنٹ افضل خان نے کہا کہ پولیس نے شہری پر طاقت کا غیر ضروری استعمال کیا۔افضل خان نے مطالبہ کیا کہ معاملہ پولیس کنڈکٹ کے لیے آزاد دفتر کو بھیجا جائے۔