اردو ورلڈ کینیڈا ( ویب نیوز ) اسرائیلی فوج نے غزہ میں پناہ گزینوں کے اسکول پرحملہ کیا جس کے نتیجے میں 30 سے ​​زائد فلسطینی شہید ہوگئے۔غیر ملکی میڈیا رپورٹس کے مطابق اسرائیلی فوج نے دیر البلاح میں پناہ گزینوں کے اسکول پر حملہ کیا جس کے نتیجے میں 30 سے ​​زائد فلسطینی شہید اور 100 سے زائد زخمی ہوگئے۔

رپورٹ کے مطابق اسرائیلی فوج نے رفح اور شمالی غزہ پر بھی بمباری کی جس کے نتیجے میں کل سے اب تک 80 سے زائد فلسطینی شہید ہو چکے ہیں۔دوسری جانب خان یونس کے مشرقی علاقوں میں ایک ہفتے سے جاری بمباری میں 170 سے زائد فلسطینی شہید اور 2 لاکھ فلسطینی بے گھر ہوگئے۔

اسرائیلی فوج نے خان یونس کے مغربی علاقے کو بھی خالی کرنے کا کہا ہے۔دوسری جانب غزہ شہر میں فلسطینی مزاحمت کاروں کی اسرائیلی فوج سے جھڑپ ہوئی جس میں متعدد اسرائیلی فوجیوں کے ہلاک اور زخمی ہونے کی اطلاعات ہیں۔دریں اثنا، جنوب مشرقی ایشیائی ممالک کی تنظیم (آسیان) کے وزرائے خارجہ نے غزہ میں بدترین انسانی صورتحال پر شدید تشویش کا اظہار کیا ہے۔