اردو ورلڈ کینیڈا ( ویب نیوز ) وینزویلا میں لوگوں نے متنازعہ انتخابی نتائج کو تسلیم کرنے سے انکار کردیا اور سڑکوں پر نکل آئے، دارالحکومت کے مختلف علاقوں میں عوام اور پولیس کے درمیان پرتشدد جھڑپیں ہوئیں۔سکیورٹی فورسز نے متنازعہ انتخابی نتائج کے خلاف احتجاج کرنے والے مظاہرین کو منتشر کرنے کے لیے آنسو گیس اور ربڑ کی گولیوں کا استعمال کیا۔ہزاروں لوگ جوق در جوق وسطی کراکس پہنچے، جن میں سے کچھ نے شہر کے آس پاس کے پہاڑوں پر کچی بستیوں سے میلوں پیدل چل کر صدارتی محل کی طرف مارچ کیا۔
کاراکاس کی سڑکوں پر پولیس اور فوج کی بھاری نفری موجود تھی جس کا مقصد مظاہرین کو منتشر کرنا اور انہیں صدارتی محل کی طرف بڑھنے سے روکنا تھا۔کچھ علاقوں میں مظاہرین نے ٹائروں، کاروں اور کوڑا کرکٹ کو جلاتے ہوئے صدر مادورو کے پوسٹرز کو پھاڑ دیا اور جلا دیا۔اپوزیشن نے مادورو کی جیت کے اعلان کو جعلی قرار دیتے ہوئے مسترد کر دیا اور کہا کہ ان کے امیدوار ایڈمنڈو گونزالیز نے 73.2 فیصد ووٹ لے کر کامیابی حاصل کی۔
ملک کے معاشی بحران پر بڑے پیمانے پر عدم اطمینان کے درمیان 11 سال اقتدار میں رہنے کے بعد صدر مادورو کو معزول کرنے کی کوشش میں اپوزیشن جماعتوں نے مسٹر گونزالیز کے پیچھے ریلی نکالی تھی۔ارجنٹائن واحد ملک ہے جس نے صدر مادورو کی انتخابی فتح کو تسلیم کرنے سے انکار کیا ہے اور وینزویلا نے جواب میں بیونس آئرس سے سفارت کاروں کو واپس بلا لیا ہے۔
