اردو ورلڈ کینیڈا ( ویب نیوز ) سعودی عرب میں ہیروئن سمگل کرنے والے پاکستانی کا سرقلم ، سعودی عرب میں پاکستانی شہری ندیم شہزاد کو ہیروئن اسمگلنگ کے الزام میں سزائے موت سنائی گئی جس پر آج عملدرآمد کر دیا گیا۔سعودی میڈیا کے مطابق ندیم شہزاد کو آج دمام میں سزائے موت سنائی گئی۔ مجرم کو تمام قانونی مدد فراہم کی گئی اور اپیل کا حق بھی دیا گیا۔وزارت داخلہ کی جانب سے جاری بیان میں کہا گیا ہے کہ ندیم شہزاد کو ہیروئن فروخت کرنے کے الزام میں رنگے ہاتھوں گرفتار کیا گیا۔
سزائے موت ایک سال سے زائد عرصے تک چلنے والے مقدمے کے بعد سنائی گئی، جسے مجرم نے اپیل کورٹ اور پھر سپریم کورٹ میں چیلنج کیا تھا۔ تاہم دونوں عدالتوں نے سزائے موت کو برقرار رکھا۔ خیال رہے کہ سعودی عرب میں ہیروئن کی اسمگلنگ کی سزا موت ہے اور عموما سر قلم کر کے سزائے موت دی جاتی ہے۔ سب سے زیادہ سزائے موت دینے والے ممالک میں سعودی عرب بھی شامل ہے جس پر انسانی حقوق کی عالمی تنظیموں نے شدید تنقید کی ہے۔
