اردو ورلڈ کینیڈا ( ویب نیوز ) جنوبی لبنان میں حزب اللہ اور اسرائیلی فوج کے درمیان شدید جھڑپوں میں تین اسرائیلی فوجی ہلاک اور بارہ زخمی ہوئے۔ حزب اللہ نے شمالی اسرائیل پر 90 سے زیادہ راکٹ اور ڈرون فائر کیے ۔صہیونی جارحیت کے خلاف جوابی کارروائی کرتے ہوئے شمالی اسرائیل پر حزب اللہ کے 90 سے زائد راکٹ اور ڈرون حملوں میں 4 اسرائیلی زخمی اور املاک کو بھی نقصان پہنچا۔دوسری جانب اسرائیلی طیاروں کی جانب سے جنوبی لبنان میں سرکاری عمارت پر بمباری میں مقامی میئر سمیت 15 افراد شہید ہوگئے۔لبنان کے شہر قنا میں گھر اور طبی مرکز اور المونہ قصبے پر اسرائیلی بمباری سے 20 سے زائد افراد ہلاک اور چوبیس گھنٹوں میں 27 افراد ہلاک ہوئے۔اسرائیل نے بیروت میں حزب اللہ کے زیر زمین ہتھیاروں کے ڈپو کو نشانہ بنانے کا دعویٰ بھی کیا ہے۔
دوسری جانب اسرائیلی فوج کی جانب سے غزہ پر بمباری جاری ہے، گذشتہ 24 گھنٹوں کے دوران اسرائیلی جارحیت کے باعث 70 سے زائد فلسطینی شہید ہوئے۔جبالیہ کیمپ کا اسرائیلی محاصرہ بارہ دنوں سے جاری ہے جہاں لاکھوں فلسطینی پھنسے ہوئے ہیں۔غزہ کی بگڑتی ہوئی انسانی صورتحال پر سلامتی کونسل کا ہنگامی اجلاس طلب کیا گیا ہے، امریکہ نے اسرائیل سے یہ بھی مطالبہ کیا ہے کہ وہ یہ ثابت کرے کہ اس کی غزہ میں فلسطینیوں کو بھوک سے مرنے کی پالیسی نہیں ہے۔