اردوورلڈ کینیڈا( ویب نیوز)سابق وزیراعظم شاہد خاقان عباسی نے کہا ہے کہ مری میں منصوبے عوام کی مشاورت سے شروع کیے جائیں۔
عوامی جرگے سے خطاب کرتے ہوئے شاہد خاقان عباسی نے کہا کہ تمام سیاسی جماعتوں کو عوام کے حقوق کے لیے ایک پلیٹ فارم پر جمع ہونا چاہیے۔ اگر حکومت سیاحت کے فروغ کے لیے کوئی قدم اٹھانا چاہتی ہے تو اسے پہلے اسٹیک ہولڈرز کو اعتماد میں لینا چاہیے۔
انہوں نے کہا کہ ہم سچ بولنے اور جو ناانصافی ہو رہی ہے اس پر بات کرنے آئے ہیں۔ ہم کسی سے جھگڑا نہیں چاہتے۔ میری گزارش ہے کہ ہم بہت اچھے ہیں لیکن ہم پر ظلم نہ کریں اور نہ ہی ہمیں آزمائیں ۔
شاہد خاقان عباسی نے کہا کہ حکومت عوام سے مشاورت کے بعد مری میں منصوبے شروع کرے۔ یہ کسی ترقی کے خلاف نہیں ہونا چاہیے بلکہ بامقصد ہونا چاہیے۔ انتظامیہ کے پاس فیصلے کرنے کا اختیار نہیں ہے۔ قانون سب کے لیے یکساں ہونا چاہیے۔
سابق وزیراعظم نے کہا کہ مری میں ٹیکس لگائے جا رہے ہیں جس کا کوئی مقصد نہیں۔ مری کی تاریخ میں پہلی بار دفعہ 144 نافذ کر دی گئی ہے۔ میاں نواز شریف روزگار دیتے تھے۔ میاں نواز شریف ایسا فیصلہ نہیں کر سکتے۔ اس علاقے کی انتظامیہ ان کی عزت کرتی تھی۔
ان کا کہنا تھا کہ پولیس کو کسی کی حدود کی خلاف ورزی کا کوئی حق نہیں، ناکام حکومت دفعہ 144 نافذ کرتی ہے، افسران یہاں حکومت نہ کریں، خدمت کریں، ہم سے جھگڑا نہ کریں۔
شاہد خاقان عباسی کا مزید کہنا تھا کہ مری کے عوام باشعور ہیں، عوام کی طاقت کے آگے کوئی نہیں ٹھہر سکتا، بااختیار انتظامیہ سے مذاکرات کے لیے تیار ہیں، اس علاقے کے عوام کے مسائل کا حل ہونا چاہیے ۔
