اردو ورلڈ کینیڈا ( ویب نیوز ) حماس کی جانب سے اسرائیلی یرغمالیوں کی رہائی کو غیر معینہ مدت تک ملتوی کرنے کے بعد امریکی صدر ڈونلڈ ٹرمپ نے یرغمالیوں کو رہا نہ کرنے کی صورت میں ہفتے کے روز غزہ میں جنگ بندی ختم کرنے کی دھمکی دی ہے۔
غیر ملکی میڈیا کے مطابق امریکی صدر ڈونلڈ ٹرمپ نے پیر کو فلسطینی مزاحمتی تنظیم حماس کو سخت انتباہ جاری کیا۔ ٹرمپ نے کہا کہ اگر ہفتے کی دوپہر 12 بجے تک تمام اسرائیلی یرغمالیوں کو رہا نہ کیا گیا تو حالات قابو سے باہر ہو جائیں گے۔امریکی صدر ڈونلڈ ٹرمپ نے کہا کہ اگر ہفتے کی دوپہر 12 بجے تک تمام مغویوں کو رہا نہ کیا گیا تو میں جنگ بندی معاہدے کو منسوخ کرنے کا مطالبہ کروں گا اور پھر سب کچھ ختم ہو جائے گا۔انہوں نے کہا کہ غزہ کی جنگ بندی ہفتے کو ختم ہو جائے گی اگر یرغمالیوں کو رہا نہ کیا گیا۔اس کے علاوہ ڈونلڈ ٹرمپ نے کہا کہ ان کے خیال میں اردن مہاجرین کو لینے کے لیے تیار ہو گا۔ اگر اردن اور مصر پناہ گزینوں کو نہیں لیتے تو وہ دونوں ممالک کی امداد بند کر سکتا ہے۔
واضح رہے کہ پیر کے روز حماس نے غزہ جنگ بندی معاہدے کی اسرائیل کی خلاف ورزیوں کے باعث مغویوں کی رہائی غیر معینہ مدت کے لیے ملتوی کر دی تھی۔فلسطینی مزاحمتی تنظیم حماس کے عسکری ونگ القسام بریگیڈز کے ترجمان ابو عبیدہ نے اپنے بیان میں یرغمالیوں کی رہائی روکنے کا اعلان کیا ہے۔یاد رہے کہ گزشتہ ماہ قطر، امریکا اور مصر کی ثالثی سے حماس اور اسرائیل کے درمیان جنگ بندی کا معاہدہ طے پایا تھا جس کے تحت غزہ میں 15 ماہ سے جاری جنگ کا خاتمہ ہوا تھا۔
