اردو ورلڈ کینیڈا ( ویب نیوز ) ایران اپنی جوہری تنصیبات کو پہنچنے والے نقصانات کے معاوضے کے لیے امریکہ کے خلاف اقوام متحدہ میں درخواست دائر کرنے کی تیاری کر رہا ہے۔

ایران کے نائب وزیر خارجہ سعید خطیب زادہ نے کہا ہے کہ امریکہ کو ایرانی تنصیبات کو پہنچنے والے نقصان کی تلافی کرنی چاہیے۔انہوں نے کہا کہ ایران اقوام متحدہ میں امریکہ کے خلاف شکایت درج کرائے گا۔سعید خطیب زادہ نے تسلیم کیا کہ یہ امریکہ ہی تھا جس نے جنگ کو روکنے کے لیے پیغامات بھیجے۔انہوں نے کہا کہ امریکہ نے ایران کو مختلف چینلز کے ذریعے پیغامات بھیجے لیکن تہران اپنے موقف پر ثابت قدم رہا کہ جنگ بندی کے حوالے سے کوئی فیصلہ کرنے سے پہلے جارحیت کو روکنا چاہیے۔ایران کے نائب وزیر خارجہ نے اس بات پر زور دیا کہ ایرانی قوم نے دشمن کی وحشیانہ جارحیت کو روکنے کے لیے اپنی مزاحمت اور یکطرفہ کارروائی کے ذریعے صہیونی حکومت میں خوف پیدا کیا ہے۔سعید خطیب زادہ نے کہا کہ ایران نے صہیونی حکومت کے ساتھ کسی تحریری معاہدے پر دستخط نہیں کیے ہیں جس میں کوئی تفصیلات شامل ہوں، بلکہ جنگ بندی جو طے پائی ہے اس نے صیہونیوں کی جارحیت کو روک دیا ہے، اس کے برعکس ایران اپنی تیاریوں کے باوجود حملہ نہیں کرے گا۔واضح رہے کہ اسرائیل نے 13 جون کو ایران پر حملہ کیا اور 12 روزہ جنگ میں ایرانی فوجی اڈوں اور جوہری تنصیبات کو نشانہ بنایا۔. تاہم اس کے بعد، امریکہ نے بھی اسرائیل کی حمایت میں چھلانگ لگا دی اور 22 جون کو نتنز، فورڈو اور اصفہان میں جوہری تنصیبات پر بمباری کی، اور دعویٰ کیا کہ اس نے بھاری نقصان پہنچایا ہے۔بعد ازاں امریکی صدر ڈونلڈ ٹرمپ نے اسرائیل اور ایران کے درمیان جنگ بندی کا اعلان کیا اور دونوں ممالک کے درمیان جنگ بندی 24 جون کو عمل میں آئی۔