اردو ورلڈ کینیڈ ا (ویب نیوز) افغانستان کے نائب وزیر دفاع مولوی محمد یعقوب مجاہد کا کہنا ہے کہ افغانستان کی فضائی حدود اب بھی امریکا کے قبضے میں ہے۔

  طالبان حکومت کے نائب وزیر دفاع اور طلبان تحریک کے بانی ملا عمر مجاہد کے بیٹے محمد یعقوب مجاہد نے کہا کہ اتحادی حکومت کے نام پر غیر ملکی مداخلت کو قبول نہیں کیا جا سکتا۔

افغانستان کی فضائی حدود میں امریکی طیاروں کی موجودگی کے سوال پر افغان نائب وزیر دفاع نے کہا کہ یہ فضائی حدود کی خلاف ورزی ہے۔ فضائی حدود اب بھی امریکہ کے قبضے میں ہے۔ میں پہلے بھی اس کی وضاحت کر چکا ہوں اور اب میں نہیں چاہتا کہ کشیدگی اور دوسرے ممالک کے ساتھ ہمارے تعلقات خراب ہوں۔

مولوی محمد یعقوب مجاہد نے مزید کہا کہ افغان فضائی حدود میں امریکی طیاروں کی پروازیں دوحہ معاہدے کی خلاف ورزی ہے۔ امریکی حکام سے کہا گیا کہ وہ ان پروازوں کو روک دیں۔

انہوں نے کہا کہ ہمسایہ ممالک سمیت عالمی برادری چاہتی ہے کہ طالبان ایسی حکومت بنائے جو عوام کی نمائندگی کرے لیکن طالبان کی حکومت میں ہر قوم کے لوگ ہوتے ہیں۔ اگر ہمیں وقت دیا گیا اور طالبان کی حکومت جاری رہی تو مجھے یقین ہے کہ حکومت میں تنوع آئے گا اور اہم عہدوں پر پیشہ ور افراد کو تعینات کیا جائے گا۔