اردو ورلڈ کینیڈا ( ویب نیوز ) وزیراعلیٰ محمود خان نے خیبرپختونخوا اسمبلی تحلیل کرنے کی سمری پر دستخط کرکے عملدرآمد کے لیے گورنر کو ارسال کردی۔ گورنر کے پی نے سمری موصول ہونے کی تصدیق کر دی ہے۔وزیراعلیٰ محمود خان نے 17 جنوری کو 9 بجے اسمبلی تحلیل کرنے کی سمری پر دستخط کر کے گورنر کو بھجوا دیے۔ اگر گورنر نے آئینی اور قانونی طور پر 48 گھنٹوں کے اندر اسمبلی تحلیل نہیں کی تو 19 جنوری کو 9 بجے اسمبلی خود ہی تحلیل ہو جائے گی۔
وزیراعلیٰ محمود خان نے کہا کہ انہوں نے عمران خان کے حکم پر عمل کیا اور اسمبلی تحلیل کرنے کے مشورے پر دستخط کرکے تمام افواہوں کو جھوٹا ثابت کردیا۔ انہوں نے کہا کہ وہ مستقبل میں دو تہائی اکثریت کے ساتھ واپس آئیں گے، خیبرپختونخوا کے عوام نے ان پر اعتماد کا اظہار کیا ہے اور وہ آئندہ الیکشن میں بھی تحریک انصاف کو ہی منتخب کریں گے۔
یہ بھی پڑھیں
گورنر پنجاب کو اسمبلی تحلیل کی سمری موصول ہوگئی
دوسری جانب صوبائی حکومت کے معاون خصوصی برائے اطلاعات بیرسٹر سیف نے کہا کہ اسمبلی تحلیل کرنے کی سمری گورنر کو ارسال کر دی گئی ہے، اگر گورنر نے سمری منظور نہ کی تو بھی اسمبلی خود بخود تحلیل ہو جائے گی۔ بعد ازاں گورنر ہاؤس خیبرپختونخوا کے ترجمان نے خیبرپختونخوا اسمبلی تحلیل کرنے کی سمری موصول ہونے کی تصدیق کردی۔
مزید پڑھیں
پنجاب اسمبلی تحلیل ،وفاقی حکومت کا 12 اپریل کو انتخابات کرانے کا فیصلہ
گورنر خیبرپختونخوا حاجی غلام علی نے کہا کہ اسمبلی تحلیل کرنے کا مشورہ ملا ہے جس پر تمام معاملات کو دیکھ کر آئین و قانون کے مطابق فیصلہ کیا جائے گا۔ اسمبلی تحلیل ہونے کے بعد محمود خان نگراں وزیراعلیٰ کے تقرر تک قائم مقام وزیراعلیٰ کے طور پر کام کرتے رہیں گے۔
