اردو ورلڈ کینیڈا ( ویب نیوز )روسی صدر ولادی میر پیوٹن نے کہا ہے کہ روس جنگ کا خاتمہ چاہتا ہے، تمام تنازعات سفارت کاری سے ختم ہوتے ہیں۔

صحافیوں سے بات کرتے ہوئے روسی صدر پیوٹن نے کہا کہ روس کا مقصد فوجی تنازع کا پہیہ گھمانا نہیں بلکہ اس جنگ کو ختم کرنا ہے۔
ان کا کہنا تھا کہ ہم جنگ کے خاتمے کے لیے تیزی سے کوششیں کریں گے، وہ کئی بار کہہ چکے ہیں کہ دشمنی کی شدت سے بلا جواز نقصان ہوتا ہے۔
انہوں نے مزید کہا کہ روس کے مخالفوں کے لیے بہتر ہے کہ وہ جلد از جلد اس بات کا ادراک کر لیں کہ روس نے کبھی بھی مذاکرات سے انکار نہیں کیا۔
پیوٹن نے کہا کہ تمام مسلح تنازعات کا خاتمہ صرف سفارتی اور مذاکراتی عمل سے ہوتا ہے، تنازع کے فریق جلد یا بدیر بیٹھ کر کسی معاہدے پر پہنچ جاتے ہیں۔
صدر پیوٹن نے کہا کہ امریکہ کا پیٹریاٹ دفاعی نظام کافی پرانا ہے اور یہ روسی S-300 سسٹم کی طرح کام نہیں کرتا۔