اردو ورلڈ کینیڈا ( ویب نیوز ) لیبیا میں تارکین وطن کی ایک اور کشتی ڈوب گئی، حادثے میں 11 لاشیں نکال لی گئیں جن میں سے چار کی شناخت پاکستانیوں کے طور پر ہوئی ہے۔
لیبیا میں پاکستانی سفارتخانے کی جانب سے وزارت خارجہ کو بھیجی گئی رپورٹ میں کہا گیا ہے کہ کشتی کو حادثہ 12 اپریل کو مشرقی لیبیا کے شہر سرتے کے قریب ہاروا ساحل پر پیش آیا۔جائے حادثہ سے اب تک گیارہ لاشیں نکالی جا چکی ہیں جن میں سے چار پاکستانی ہیں۔ پاکستانی سفارت خانے کی ایک ٹیم نے واقعے کے بارے میں معلومات اکٹھی کرنے کے لیے سرتے شہر کا دورہ کیا اور قومی دستاویزات سے چار لاشوں کی شناخت پاکستانیوں کے طور پر کی ہے۔ ان میں سے تین کا تعلق منڈی بہاؤالدین اور ایک کا گوجرانوالہ سے ہے۔ رپورٹ کے مطابق زاہد محمود ولد لیاقت علی کا تعلق گوجرانوالہ سے ہے جبکہ سمیر علی ولد راجہ عبدالقدیر، سید علی حسین ولد شفقت الحسین اور آصف علی ولد نذر محمد کا تعلق منڈی بہاؤالدین سے ہے۔ اس کے علاوہ دو لاشوں کی تاحال شناخت نہیں ہوسکی، پانچ لاشیں مصری شہریوں کی ہیں۔پاکستانی سفارتخانہ حادثے کے بارے میں مزید معلومات کے لیے مقامی حکام سے رابطے میں ہے۔
