اردو ورلڈ کینیڈا ( ویب نیوز )پنجاب حکومت نے عاشورہ کے موقع ناخوشگوار صورتحال سے بچنے اور بہتر سکیورٹی کے لئے ڈبل سواری پر پابندی عائد کر دی۔
وزیراعلیٰ پرویز الٰہی کی زیر صدارت صوبائی کابینہ کا پہلا اجلاس ہوا جس میں چار نکاتی ایجنڈے کی منظوری دی گئی۔
اجلاس کے دوران عاشورہ کے لیے صوبائی حکومت نے فول پروف سیکیورٹی پلان کی منظوری دے دی۔ حساس مقامات اور محرم کے جلوسوں کے راستوں پر سیلولر سروس معطل رہے گی۔وزیراعلیٰ نے صوبائی وزراء اور مشیروں کو ہدایت کی کہ وہ اپنے متعلقہ اضلاع میں سکیورٹی انتظامات کی نگرانی کریں۔
اجلاس میں یہ بھی فیصلہ کیا گیا کہ عاشورہ، محرم الحرام کے دوران امن و امان کی صورتحال کو برقرار رکھنے کے لیے اضلاع کی سطح پر مسلسل اجلاس منعقد کیے جائیں گے۔ اجلاس میں تمام مجالس اور جلوسوں کی سی سی ٹی وی کوریج کو بھی ممکن بنایا جائے۔
اجلاس میں اس بات پر بھی زور دیا گیا کہ امن کمیٹیوں کے اراکین رابطہ کاری میں فعال کردار ادا کریں۔
