اردوورلڈ کینیڈا( ویب نیوز)کینیڈین وزیر خارجہ میلانے جولی نے کہا ہے کہ اگر نومنتخب امریکی صدر نے کینیڈین پراڈکٹس پر کسٹم ڈیوٹی بڑھائی تو جواب میں امریکیوں پر ٹرمپ ٹیکس عائد کیا جائے گا۔
اردو نیوز کے مطابق کینیڈین وزیر خارجہ نے کہا کہ اس طرح امریکی ہمارے خلاف تجارتی جنگ شروع کریں گے۔انہوں نے کہا کہ یہ دہائیوں بعد کینیڈا اور امریکا کے درمیان ایک بہت بڑی تجارتی جنگ ہوگی۔میلانے جولی نے واشنگٹن میں ایک پریس کانفرنس میں کہا کہ ہم اپنی طرف سے زیادہ سے زیادہ دبا ڈالنے کے لیے تیار ہیں۔کینیڈا کی وزیر خارجہ نے کہا کہ اگر ٹرمپ نے اپنے اعلان پر عمل کیا تو کینیڈا نے بھی اقدامات کی تیاری کی ہے۔
ڈونلڈ ٹرمپ کی مجوزہ پالیسی پر عملدرآمد کے نتیجے میں کینیڈا کے صارفین اور ان کی ملازمتوں پر بہت بڑا اثر پڑے گا۔کینیڈا کے وزیراعظم جسٹن ٹروڈو نے گزشتہ دنوں کہا تھا کہ ہم کینیڈا اور کینیڈا کے عوام کا دفاع مضبوط کریں گے اور اس پر یکجا ہیں۔انہوں نے کہا کہ مجوزہ ٹیکس امریکیوں کی ملازمتوں کو خطرے میں ڈالے گا، امریکی صارفین کے لیے قیمتیں بڑھیں گی، ہماری اجتماعی سکیورٹی کو خطرے سے دوچار کرے گا اور پورے براعظم کو متاثر کرے گا۔
واضح رہے کہ یہ کینیڈا کی جانب سے تجارتی مخاصمت پر پہلا سخت اور باضابطہ ردعمل تھا جو ڈونلڈ ٹرمپ کے بیانات کے بعد آیا۔ڈونلڈ ٹرمپ آئندہ ہفتے امریکی صدر کا حلف اٹھائیں گے۔ انہوں نے کہا ہے کہ وہ اپنی معاشی اور خارجہ پالیسی کے منصوبے کے تحت کینیڈا سے درآمد کی جانے والی اشیا پر 25 فیصد ٹیکس عائد کریں گے۔ٹرمپ کی مجوزہ پالیسی کے تحت میکسیکو، چین اور دیگر تجارتی شراکت دار ممالک سے آنے والی درآمدات پر بھی کسٹم ڈیوٹی بڑھائی جائے گی۔
