اردوورلڈکینیڈا( ویب نیوز)کینیڈا کے وینکوور انٹرنیشنل ایئرپورٹ پر ایئر انڈیا کے ایک پائلٹ کو پرواز سے اتار کر گرفتار کر لیا گیا، جس کے بعد ٹرانسپورٹ کینیڈا نے فضائی کمپنی کو سخت وارننگ جاری کی ہے کہ اگر شراب نوشی سے متعلق قوانین پر عمل نہ کیا گیا تو پروازوں کی اجازت منسوخ کی جا سکتی ہے۔ یہ واقعہ 23 دسمبر کو پیش آیا، جس کی تصدیق ٹرانسپورٹ کینیڈا نے ایک باضابطہ بیان میں کی ہے۔
ٹرانسپورٹ کینیڈا کے مطابق وہ اس معاملے پر ایئر انڈیا اور بھارت کے سول ایوی ایشن حکام کے ساتھ رابطے میں رہے گا تاکہ اس واقعے کے بعد “مناسب فالو اپ اقدامات” کو یقینی بنایا جا سکے۔ بیان میں واضح کیا گیا کہ فضائی حفاظت کے معاملے میں کسی بھی قسم کی کوتاہی برداشت نہیں کی جائے گی۔
رچمنڈ آر سی ایم پی نے بتایا کہ یہ گرفتاری ایک “تشویش کی اطلاع” کے بعد عمل میں آئی، جو ایئر لائن کے ایک عملے کے رکن سے متعلق تھی۔ پولیس کے مطابق اس واقعے کی تفتیش جاری ہے اور فی الحال مزید تفصیلات جاری نہیں کی جائیں گی۔
یہ بھی پڑھیں :ہوائی جہاز کو گرانے کی کوشش کا الزام، امریکی پائلٹ گرفتار
وینکوور ایئرپورٹ کی ایک ترجمان نے بتایا کہ متعلقہ پائلٹ ایئر انڈیا کی روزانہ شیڈول شدہ پرواز، جو وینکوور سے دہلی کے لیے روانہ ہونی تھی، کی تیاری کر رہا تھا۔ واقعے کے باعث پرواز کو کئی گھنٹوں کی تاخیر کا سامنا کرنا پڑا، تاہم بعد ازاں پرواز محفوظ طریقے سے روانہ ہو گئی۔
ایئر انڈیا کے ترجمان نے ای میل کے ذریعے جاری بیان میں کہا کہ پرواز میں تاخیر اس وقت ہوئی جب “کاک پٹ کے عملے کے ایک رکن کو روانگی سے قبل پرواز سے اتار دیا گیا۔” بیان میں مزید کہا گیا کہ کینیڈین حکام نے پائلٹ کی ڈیوٹی کے لیے موزونیت پر سوالات اٹھائے، جس کے بعد متعلقہ پائلٹ کو مزید تفتیش کے لیے لے جایا گیا۔
ایئر لائن کے مطابق حفاظتی ضوابط کے تحت متبادل پائلٹ کو فوری طور پر تعینات کیا گیا، جس کی وجہ سے پرواز تاخیر کا شکار ہوئی۔ کمپنی نے کہا ہے کہ وہ مقامی حکام کے ساتھ مکمل تعاون کر رہی ہے اور تفتیش مکمل ہونے تک پائلٹ کو پرواز کی ذمہ داریوں سے ہٹا دیا گیا ہے۔
ایئر انڈیا نے اپنے بیان میں اس بات پر زور دیا کہ کمپنی شراب نوشی یا کسی بھی قسم کے قواعد و ضوابط کی خلاف ورزی پر “زیرو ٹالرینس پالیسی” رکھتی ہے۔ بیان کے مطابق، اگر تفتیش میں کسی بھی خلاف ورزی کی تصدیق ہوئی تو کمپنی پالیسی کے مطابق سخت تادیبی کارروائی کی جائے گی۔
فلائٹ ٹریکنگ ویب سائٹ فلائٹ ریڈار 24 کے مطابق، 23 دسمبر کو وینکوور سے دہلی (ویانا کے راستے) جانے والی ایئر انڈیا کی پرواز سہ پہر 3 بجے روانہ ہونی تھی، لیکن وہ رات 10 بج کر 2 منٹ پر وینکوور ایئرپورٹ سے روانہ ہوئی۔بھارتی میڈیا رپورٹس میں دعویٰ کیا گیا ہے کہ مذکورہ پائلٹ بریتھ الائزر ٹیسٹ میں ناکام رہا تھا، تاہم کینیڈین حکام نے اس کی باضابطہ تصدیق نہیں کی۔
ٹرانسپورٹ کینیڈا نے واضح کیا کہ ایئر انڈیا کی ریگولیٹری نگرانی کی بنیادی ذمہ داری بھارت کے ڈائریکٹوریٹ جنرل آف سول ایوی ایشن پر عائد ہوتی ہے، تاہم اگر کینیڈا میں کسی بھی قسم کے حفاظتی خدشات سامنے آئے تو فوری کارروائی کی جائے گی۔
کینیڈین ایوی ایشن قوانین کے مطابق کوئی بھی پائلٹ یا عملے کا رکن شراب نوشی کے 12 گھنٹے کے اندر ڈیوٹی انجام نہیں دے سکتا، اور نہ ہی نشے کی حالت میں خدمات انجام دینا قانونی ہے۔ ضوابط کی خلاف ورزی کی صورت میں ایئر لائن کے خلاف عدالتی کارروائی، جرمانے یا پرواز کی اجازت معطل یا منسوخ کی جا سکتی ہے۔
ٹرانسپورٹ کینیڈا نے اپنے بیان میں کہا کہ مسافروں کی سلامتی اور ٹرانسپورٹ نظام کا تحفظ اس کی اولین ترجیح ہے۔واضح رہے کہ جون میں ایئر انڈیا کا لندن جانے والا ایک طیارہ بھارتی شہر احمد آباد میں پرواز کے فوراً بعد رہائشی علاقے میں گر کر تباہ ہو گیا تھا، جس میں طیارے میں سوار 241 افراد ہلاک ہو گئے تھے۔
