اردو ورلڈ کینیڈا ( ویب نیوز ) بھارت کی ریاست گجرات میں ایک حیران کن اور چونکا دینے والا طبی واقعہ پیش آیا جس نے ڈاکٹروں کو بھی ششدر کر دیا۔
یہ واقعہ ضلع امرے لی کے علاقے ساور کنڈلہ کے ایک اسپتال میں پیش آیا جہاں 66 سالہ خاتون گیتابین شدید خارش اور آنکھوں میں درد کی شکایت لے کر اسپتال پہنچیں۔ معائنے کے دوران ماہر چشم ڈاکٹر مرگنک پٹیل نے خاتون کی پلکوں میں 250 جوں اور 85 انڈے دریافت کیے۔
ڈاکٹر کے مطابق یہ جوں زندہ تھیں اور ان کی آنکھوں کی پلکوں کے اندرونی حصے میں بسیرا کیے ہوئے تھیں۔ انہیں نکالنے کا عمل تقریباً دو گھنٹے تک جاری رہا۔ اس دوران خصوصی آلے **“میک فیرسن (McPherson)” کا استعمال کیا گیا۔چونکہ یہ جوں روشنی کی شدت سے حساس تھیں، اس لیے پورے عمل کے دوران آنکھوں میں مسلسل قطرے ڈالے جاتے رہے تاکہ درد اور جلن کم ہو سکے۔
ڈاکٹر مرگنک پٹیل کا کہنا تھا کہ ان کے 21 سالہ پیشہ ورانہ کیریئر میں یہ اپنی نوعیت کا پہلا واقعہ ہے۔ انہوں نے بتایا کہ اس بیماری کو “فیتھریاسس پَلپیبرارم (Phthiriasis Palpebrarum)” کہا جاتا ہے جو عموماً صفائی کی کمی، آلودہ بستر، تکیے، کمبل یا جانوروں سے قریبی رابطے کے باعث پیدا ہوتی ہے۔ڈاکٹروں کے مطابق اس مرض میں پلکوں میں شدید خارش، جلن، سوجن اور سفید ذرات کی موجودگی عام علامات ہیں۔ اگر بروقت علاج نہ کیا جائے تو یہ انفیکشن مزید بگڑ سکتا ہے۔
علاج کے بعد جب خاتون کا اگلے روز دوبارہ معائنہ کیا گیا تو ان کی آنکھیں مکمل طور پر صاف اور صحت مند پائی گئیں، جبکہ کئی ہفتوں بعد وہ پہلی بار سکون سے سو سکیں۔ ماہرین نے اس واقعے کو ذاتی صفائی اور حفظانِ صحت کی اہمیت کا ایک سبق قرار دیتے ہوئے کہا کہ بظاہر معمولی خارش بھی کسی سنگین طبی مسئلے کی علامت ہو سکتی ہے۔
