اردو ورلڈ کینیڈا ( ویب نیوز ) اسلام آباد سمیت خیبرپختونخوا کے کئی علاقے زلزلے سے لرز اٹھے جب کہ ریکٹر سکیل پر زلزلے کی شدت 4.5 ریکارڈ کی گئی۔اسلام آباد، سوات، پشاور، مردان، نوشہرہ، مالاکنڈ اور لوئر دیر میں زلزلے کے جھٹکے محسوس کیے گئے جب کہ مانسہرہ اور ہزارہ ڈویژن کے دیگر علاقوں میں بھی زلزلے کے جھٹکے محسوس کیے گئے۔

زلزلہ پیما مرکز حکام کا کہنا ہے کہ پشاور سمیت خیبرپختونخوا کے مختلف علاقوں میں زلزلے کے جھٹکے محسوس کیے گئے، زلزلے کا مرکز کوہ ہندوکش میں 187 کلومیٹر کی گہرائی میں تھا۔یاد رہے کہ اس سے قبل 8 جون 2024 کو سوات، مینگورہ اور گردونواح میں زلزلے کے جھٹکے محسوس کیے گئے تھے جب کہ 2 مئی کو سندھ کے دارالحکومت کراچی کے مختلف علاقوں میں زلزلے کے جھٹکے محسوس کیے گئے تھے۔